बाँके । नेपालगन्ज–गुलरिया हुलाकी राजमार्ग अन्तर्गत खजुराको पेडारी नालामा निर्माणाधीन चार लेनको पुल निर्माण कार्य अन्तिम चरणमा पुगेको छ । निर्धारित समयभन्दा निकै अगाडि नै काम सकिने भएपछि स्थानीय बासिन्दा र यात्रुहरूमा खुसी छाएको छ ।

हुलाकी राजमार्ग निर्देशनालय योजना कार्यालय नेपालगन्जका अनुसार यो पुल निर्माणको सम्झौता २०८३ वैशाख १८ गतेसम्मका लागि भए पनि निर्माण कम्पनीले तीव्र गतिमा काम अघि बढाएको छ । योजना प्रमुख लीलाबहादुर भण्डारीले खजुरावासीले भोग्दै आएको वर्षौँदेखिको सास्ती अब केही समयमै अन्त्य हुने बताए । निर्देशनालयले कामको गतिसँगै गुणस्तर कायम राख्न नियमित कार्यस्थलमै पुगेर अनुगमन गरिरहेको छ ।

नेपालगन्ज–गुलरिया सडक खण्डकै 'लाइफ लाइन' मानिएको यो पुल २२ मिटर चौडाइ र ३४.४ मिटर लम्बाइको छ । यससँगै पुलको दुवैतर्फ दुई सय मिटर एप्रोच सडक पनि निर्माण गरिनेछ । नारायणम निर्माण सेवासँग भ्याटसहित ८ करोड ९६ लाख रुपैयाँमा ठेक्का सम्झौता भएको यस आयोजनाले बाँके र बर्दियाको आवागमनलाई सहज र सुरक्षित बनाउने विश्वास लिइएको छ।

खजुरा गाउँपालिकाका अध्यक्ष डम्बर विकले खजुरावासीको निरन्तरको पहल र सपना बल्ल पूरा हुन लागेको भन्दै उत्साह व्यक्त गरे । खजुरामा चार लेन सडक भए पनि वर्षौँ पुरानो साँघुरो पुलका कारण वर्षायाममा नालाको पानी सडकमा आउँदा यातायात घण्टौँसम्म अवरुद्ध हुने गर्थ्यो । नयाँ पुल निर्माणसँगै वर्षाको समयमा सडक डुबानमा पर्ने र यातायात रोकिने समस्या अब इतिहास बन्नेछ ।