चितवन । जिल्लाका स्वयंसेवी रक्तदाताले सङ्गठित भएर स्थापना गरेको ब्लड डोनर्स सोसाइटी नेपालले देशभर बिरामी र रक्तदातालाई जोड्ने काम गर्दै आएको छ । सोसाइटीले नियमित र नयाँ रक्तदातालाई उत्प्रेरित गर्दै बिरामीलाई रगतको माग परिपूर्तिमा सहयोग पुर्याउँदै आएको छ ।
सोसाइटीका अध्यक्ष अर्जुन अधिकारीका अनुसार सोसाइटीको शाखा काठमाडौँ, चितवन र झापामा स्थापना गरिएको छ भने अन्य मुख्य सहरहरूमा सोसाइटीका प्रतिनिधिमार्फत रगत आपूर्तिमा सहजीकरण हुँदै आएको छ । उनका अनुसार कास्की, नवलपुर, मकवानपुर, पर्सा, बाँके, रुपन्देहीलगायत जिल्लामा प्रतिनिधि सक्रिय रहेका छन् ।
सोसाइटीले विशेष प्राथमिकता युवा र नयाँ रक्तदातालाई दिँदै रक्तदानमा उत्प्रेरणा दिइरहेको अध्यक्ष अधिकारीले बताए । उनका अनुसार देशभर नेपाल रेडक्रस सोसाइटीका रक्तसञ्चार केन्द्रहरूले रगत सङ्कलन र वितरणको काम गर्दै आएका छन् भने पछिल्लो समय ठुला अस्पतालहरूले आफ्नै अस्पतालमा रगत सङ्कलन र वितरण गर्दै आएका छन् । ती संस्थामा रगत नपाएर खोज्नुपर्ने अवस्थामा सोसाइटीले सहजीकरण गर्ने गरेको छ ।
‘रगतको अभावले कसैको उपचार नरोकियोस् भन्ने उद्देश्यले हामी सधैँ सक्रिय छौँ’, अध्यक्ष अधिकारीले भने । उनका अनुसार सोसाइटीको नेटवर्कमा हाल १० हजारभन्दा बढी रक्तदाता जोडिएका छन् । सामाजिक सञ्जालमार्फत रक्त समूह राखी आह्वान गरेपछि रक्तदाता स्वतःस्फूर्त रूपमा रक्तदानमा सहभागी हुने गरेको उनले जानकारी दिए ।
अधिकारीका अनुसार सोसाइटीले सञ्चालन गरेको एक अभियानमा एकै दिन एक हजार ७०० युनिट रगत सङ्कलन गरिएको थियो, जुन नेपालकै पहिलो रेकर्ड हो । प्रादेशिक रक्तसञ्चार केन्द्र भरतपुरका प्रमुख रमेशकान्त पौडेलका अनुसार सोसाइटीले बिरामीका लागि रगत आपूर्तिमा सहजीकरण गर्न महत्त्वपूर्ण भूमिका निर्वाह गरेको छ । ‘सोसाइटीका कारण पछिल्ला दिनमा बिरामीहरूलाई राहत मिलेको छ’, पौडेलले भने ।
त्यसैगरी चितवन मेडिकल कलेजका प्रमुख प्रशासक प्रताप देवकोटाले सोसाइटी स्थापना भएपछि रगत अभावका कारण बिरामीको उपचार रोक्नुपर्ने अवस्था नरहेको बताए । उनका अनुसार क्यान्सर उपचारमा धेरै मात्रामा रगत आवश्यक पर्छ र चितवनमा विपी कोइराला मेमोरियल क्यान्सर अस्पताल तथा चितवन मेडिकल कलेजमा क्यान्सरको उपचार हुने भएकाले सोसाइटीको भूमिका महत्त्वपूर्ण बनेको छ ।
जिल्लामा दैनिक करिब १५० युनिट रगत आवश्यक पर्ने जनाइएको छ । कोरोना महामारीका समयमा रगतको चरम अभाव भएपछि जिल्लाका स्वयंसेवी रक्तदाताले केन्द्रीय तहमा समन्वय गर्दै यो संस्था स्थापना गरेका हुन् ।
सोसाइटीले सामाजिक सञ्जालको प्रयोगमार्फत युवा र नयाँ रक्तदातालाई रक्तदानमा उत्प्रेरणा दिँदै आएको छ । सामाजिक क्षेत्रमा सक्रिय योगदानका कारण सोसाइटीले राष्ट्रिय तथा अन्तर्राष्ट्रिय सम्मानसमेत प्राप्त गरिसकेको छ । रासस
