काभ्रे । भौतिक पूर्वाधार तथा यातायात मन्त्री कुलमान घिसिङले बीपी राजमार्ग, मध्यपहाडी राजमार्ग र त्यसका आसपासका सडक तथा पुलहरूको निरीक्षण र अनुगमन गरेका छन्।
सहरी विकास र ऊर्जा, जलस्रोत तथा सिँचाइ मन्त्रालयको समेत जिम्मेवारी सम्हालेका मन्त्री घिसिङले बडादसैँ पर्वको बिदाको अवसरमा पनि सम्बन्धित मन्त्रालयका प्राविधिक तथा उच्च अधिकारीहरूलाई साथमा लिएर स्थलगत निरीक्षणसहित आवश्यक निर्देशन दिएका छन्।
उनले काभ्रेपलाञ्चोक, सिन्धुली र रामेछाप जिल्लामा पर्ने महत्त्वपूर्ण सडक खण्डका बिग्रेभत्केका भौतिक संरचना र अलपत्र रहेका पुल तथा पूर्वाधारहरूको निरीक्षण गरेका हुन्। भौतिक पूर्वाधार मन्त्रालयका अनुसार निरीक्षणपछि उनले सम्बन्धित अधिकारीहरूलाई आवश्यक निर्देशन दिएका छन्।
सङ्घीय राजधानी काठमाडौँबाट बिपी राजमार्ग हुँदै गृहजिल्ला रामेछाप आएका मन्त्री घिसिङले बीपी राजमार्ग, खैरेनी घाटको पुल र निर्माणाधिन मध्यपहाडी लोकमार्गको कार्यप्रगतिबारे जानकारी लिए।
बाढी–पहिरोजस्ता कारणले बिग्रे–भत्केका संरचनाहरूको अस्थायी रूपमा भए पनि जतिसके छिटो मर्मत गर्नुपर्ने उनले बताए। उनले भत्केका पक्की पुलहरूको स्थानमा ‘बेली ब्रिज’ र ‘कल्भर्ट’ निर्माण गर्न तथा सडकमा देखिएका खाल्टाखुल्टी पुरी यातायातलाई सहजरूपमा सञ्चालन र व्यवस्थापन गर्न सम्बन्धित अधिकारीहरूलाई निर्देशन दिएको बताए।
