कञ्चनपुर । कञ्चनपुरको भीमदत्त नगरपालिका–१८ कटानस्थित गौरा मन्दिर टोलबाट प्रहरीले अवैध लागुऔषधसहित एकजना वडासदस्यलाई पक्राउ गरेको छ।
जिल्ला प्रहरी कार्यालयका प्रहरी नायब उपरीक्षक टेकबहादुर रावतका अनुसार शनिबार उक्त क्षेत्रमा अवैध लागुऔषधको कारोबार भइरहेको भन्ने विशेष सूचनाका आधारमा प्रहरी टोलीले भीमदत्त–१८ निवासी तथा सोही वडाकी वडासदस्य रूपा जैरूलाई शङ्कास्पद अवस्थामा नियन्त्रणमा लिएको हो।
प्रहरीले आज जारी गरेको विवरणअनुसार जैरूको शरीर खानतलासी गर्दा दाहिने कोखामुनि कालो प्लास्टिकको पोकोमा लुकाइछिपाइ राखेको अवस्थामा प्रतिबन्धित लागुऔषध बरामद भएको हो।
उनको साथबाट प्रोमेथाजिन हाइड्रोक्लोराइड सुई १५ एम्पुल र बुप्रेनोर्फिन हाइड्रोक्लोराइड सुई १५ एम्पुल गरी जम्मा ३० एम्पुल लागुऔषध बरामद गरिएको प्रहरीले जनाएको छ। पक्राउ परेकी जैरूमाथि लागुऔषधसम्बन्धी कसुरमा हिरासतमा राखेर आवश्यक अनुसन्धान अगाडि बढाइएको प्रहरीले बताएको छ
। रासस
