बैतडी । सिगास गाउँपालिका–१ बचकोटमा किसानलाई बारीमै कृषि प्रणालीबारे ज्ञान दिन जलवायुमैत्री कृषक पाठशाला स्थापना गरिएको छ।
दिगो आम्दानीमार्फत महिला उद्यमीको सशक्तीकरण परियोजनाअन्तर्गत पाठशाला सञ्चालन गरिएको परियोजना प्रमुख भूपाल बोहराले जानकारी दिए। पाठशालाले कृषकलाई तरकारीखेतीसम्बन्धी परामर्श दिने तथा रोग किरा नियन्त्रणका विधि अवलम्बन गर्दै उत्पादन वृद्धि गर्न टेवा पुर्याउने उनले बताए ।
कृषि प्राविधिकले कृषकको बारीमै गएर प्रयोगात्मक रुपमा बाली लगाएर तालिम दिँदा सिकाइ प्रभावकारी हुने अपेक्षा गरिएको छ। पाठशालामार्फत जलवायुमैत्री तवरले कृषिउपज उत्पादन गर्ने लक्ष्य लिइएको छ। रासायनिक मल तथा विषादी न्यूनीकरण गरी जलवायुमैत्री मलबाट उत्पादन वृद्धि गर्ने मुख्य उद्देश्य रहेको परियोजनाका कृषि प्राविधिक दिपेश धामीले जानकारी दिए ।
यसअघि यस परियोजनाबाट सुर्नया गाउँपालिका र पाटन नगरपालिकामा पनि कृषक पाठशाला सञ्चालन गरिएको थियो । रासस
