ढोरपाटन (बागलुङ) । बागलुङको ढोरपाटनमा दादुरा संंक्रमण अझै नियन्त्रणमा आउन सकेको छैन । गत फागुन ८ गते ढोरपाटन नगरपालिका–७, ८ र ९ मा दादुरा संंक्रमण फैलिएको थियो । 

फागुन २९ गतेदेखि चैत २ गतेसम्म यस क्षेत्रका बालबालिका तथा किशोरकिशोरीलाई खोप लगाएपछि संंक्रमितको संख्यामा कमी आए पनि पूर्ण रूपमा नियन्त्रणमा आउन भने सकेको छैन । विश्व स्वास्थ्य संगठन, प्रदेश जनस्वास्थ्य कार्यालय बागलुङ र स्थानीय तहका स्वास्थ्यकर्मीको टोलीले संक्रमण नियन्त्रणका लागि प्रभावित क्षेत्रमा पुगेर अध्ययन गरी खोप अभियान चलाएको थियो । 

खोप लगाएपछि दैनिक संक्रमित हुनेको संख्या कम भए पनि पूर्ण रूपमा नियन्त्रणमा आउन नसकेको प्रदेश जनस्वास्थ्य कार्यालयका प्रमुख प्रवीण शर्माले जानकारी दिए । उनका अनुसार, ढोरपाटनसँगै तमानखोला गाउँपालिकाका दुई शंकास्पद बिरामी रहेका उनको भनाइ छ । हालसम्म १३ जनामा संक्रमण पुष्टि भएको शर्माले जानकारी दिए । दादुराको लक्षण देखिएका ३३ जनाको नमुना संकलन गरी काठमाडौंस्थित राष्ट्रिय जनस्वास्थ्य प्रयोगशालामा पठाइएको उनको भनाइ छ ।

हालसम्म पाँच हजार ९३४ जना १० देखि १९ वर्ष उमेर समूहका बालबालिका तथा किशोरकिशोरीलाई खोप लगाएको प्रदेश जनस्वास्थ्य कार्यालयका खोप सुपरभाइजर राजु खत्रीले जानकारी दिए । हालसम्म २०५ शंकास्पद बिरामी छन् । हाल चार बिरामी अस्पतालमा उपचाररत छन् । तमानखोलामा शंकास्पद बिरामी देखिएपछि पश्चिम बागलुङका चारवटै पालिकामा खोप लगाउने योजना रहेको प्रदेश जनस्वास्थ्य कार्यालयले जनाएको छ । रासस