काठमाडौँ । यस वर्षको दसैँको अवसर पारेर असोज १३ गतेदेखि प्रदर्शनमा आएका तीन नेपाली चलचित्रले बक्स अफिसमा राम्रो व्यापार गरेका छन्। चलचित्र विकास बोर्डको तथ्याङ्क अनुसार असोज २३ गते मध्यरातसम्मको व्यापार उत्साहजनक देखिएको छ।
सन्तोष सेनको निर्देशन मा तयार भएको चलचित्र 'बलिदान' ले सबैभन्दा धेरै चार करोड ४२ लाख रुपैयाँ को व्यापार गर्दै शीर्ष स्थानमा रहेको छ। यो चलचित्रमा समीर भट्ट, सौगात मल्ल, अर्पण थापा र ऋचा शर्मालगायतका कलाकारहरूले अभिनय गरेका छन्।
दोस्रो स्थानमा अभिनेता हरिवंश आचार्यले शीर्ष भूमिका निर्वाह गरेको चलचित्र 'हरिबहादुरको जुत्ता' रहेको छ। दीपेन्द्रकुमार खनालको निर्देशनमा बनेको यो चलचित्रले तीन करोड ९० लाख रुपैयाँ को व्यापार गर्न सफल भएको छ। चलचित्रमा हरिवंश आचार्यसँगै स्वस्तिमा खड्का, प्रकाश सपुत, प्रियङ्का कार्की, किरण केसी लगायतका कलाकारहरूको अभिनय रहेको छ।
फूलपातीकै अवसरमा प्रदर्शन भएको अर्को चलचित्र ‘माइतीघर’ ले पनि बक्स अफिसमा राम्रो प्रदर्शन गरेको छ। रोहित अधिकारीको निर्माण र मिलन तामाङको निर्देशनमा बनेको यो चलचित्रले दुई करोड ८५ लाख रुपैयाँ को व्यापार गरेको छ। यो चलचित्रमा केदार घिमिरे, उपासना सिंह ठकुरी, धिरज मगर र प्रकाश सपुतले अभिनय गरेका छन्।
