पर्वत। पर्वतको फलेवास नगरपालिकाबाट एक वर्षमा पाँच सय २५ जनाले बसाइँसराइ गरेका छन् । आर्थिक वर्ष २०८१/८२ मा ११ वडाका एक सय ५३ घरपरिवारका ५२५ जना नगरबाहिर सरेका हुन् ।

नगरपालिकाका पञ्जीकाधिकारी ऋषिराम शर्माका अनुसार सोही अवधिमा ३३ जना मात्र नगरमा फर्किएका छन् । फलेवास–११ बाट सबैभन्दा धेरै र वडा नं ५ खानीगाउँबाट सबैभन्दा कम बसाइँसराइ भएको छ ।

नगरपालिकाका प्रवक्ता अच्युत तिवारीले निर्वाचन वर्ष, सेवा–सुविधा र रोजगारीको खोजीका कारण बसाइँसराइ बढेको बताए । शिक्षा, स्वास्थ्य, यातायात र रोजगारीको अभावले बस्ती रित्तिँदै जान थालेको स्थानीयले चिन्ता व्यक्त गरेका छन् ।

बसाइँ सरेका अधिकांश पोखरा, काठमाडौँ, चितवन र बुटवल गएको नगरपालिकाले जनाएको छ । २४ हजार ६७८ जनसङ्ख्या रहेको नगरपालिकाबाट बर्सेनि बसाइँसराइको दर बढ्दै गएको बताइएको छ ।