बैतडी । बैतडी कारागारमा रहेका कैदी र थुनुवालाई स्थानान्तरण गरिएकाे छ । जीर्ण अवस्थामा रहेको भवनलाई नयाँ निर्माण गरिने भएकाले यहाँ रहेका कैदी र थुनुवालाई विभिन्न कारागारमा स्थानान्तरण गरिएकाे हाे ।
कूल ५३ जना कैदी र छजना थुनुवालाई डडेलधुरा, दार्चुला, बझाङ र बाँकेका कारागारमा स्थानान्तरण गरियो । कारागार कार्यालय बैतडीका प्रमुख धारा भण्डारीले जानकारी दिए ।
दार्चुला कारागारमा ६ थुनुवा र ३ जना कैदी, बझाङ ९ जना कैदी, डडेल्धुरा १४ जना कैदी र बाँकेको नौबस्ता कारागारमा २७ जना कैदीलाई स्थानान्तरण गरिएकाे छ । कूल २५ जना कैदीबन्दीको क्षमता रहेको कारागारमा ५९ जना कैदीबन्दी रहेका थिए । ८५ क्षमताको नयाँ बन्दीगृह निर्माण गरिने कारागार बैतडीले जनाएको छ ।
“सघन सहकारी तथा भवन निर्माण आयोजना कार्यालय डोटी र निर्माण कम्पनीबीच सम्झौता भैसकेको छ”, उनले भने, “कार्यादेशसमेत आइसकेको छ । अबको एक/दुई दिनभित्र काम सुरु हुन्छ ।”
बन्दीगृह निर्माणका लागि रु १० करोड बजेट विनियोजन गरिएकाे छ । केकेजे कालिका एस बी जेभी सुकेधाराले बन्दीगृह निर्माणको काम गर्ने जनाइएकाे छ । सो कम्पनीसँग रु ७ करोड ९७ लाख ७१ हजार ४१९ मा सम्झौता भएकाे सघन सहकरी तथा भवन निर्माण आयोजना कार्यालय डोटीले जनाएको छ ।
विसं २०८४ असार १५ गतेभित्र निर्माण सम्पन्न गरिसक्ने लक्ष्य राखिएकाे छ । नयाँ बन्दीगृह निर्माण भएपछि कैदीबन्दीको व्यवस्थापनमा सहजता आउने विश्वास गरिएकाे कारागार प्रमुख भण्डारीले जानकारी दिए । रासस
