काठमाडौं । एघारौँ महाधिवेशनका लागि नेकपा एमालेले आज देशैभरी प्रतिनिधि छनोट गर्दै छ ।
केही निर्वाचन क्षेत्रमा भने सहमति जुटिसकेको छ भने सहमति नजुटेका क्षेत्रहरूमा आज बिहान ८ बजेदेखि निर्वाचन हुँदै छ । निर्वाचनको समयमा अधिकांश क्षेत्रमा दिउँसो २ बजेसम्म निर्वाचन हुनेछ । विभिन्न जिल्लाहरूले अनुकुलता अनुसार मतदानको समय तय गरेको प्रचार विभाग प्रमुख राजेन्द्र गौतमले बताए ।
मनोनीतसहित एमालेको ११औँ महाधिवशेनमा करिब २२ सय प्रतिनिधि सहभागी हुनेछन् । प्रतिनिधि छनोटका लागि केन्द्रीय संगठन विभागले सिफारिस गरेको प्रस्तावलाई पार्टी सचिवालयले यसअघि पनि पास गरेर मातहतका कमिटीमा पठाइसकेको छ।
एमालेको कात्तिक १५ गते बसेको केन्द्रीय सचिवालय बैठकले गरेको निर्णयानुसार प्रतिनिधिसभा निर्वाचन क्षेत्रलाई आधार मानी १२ सयबाट खुला दुई र महिला एक निर्वाचित गर्नुपर्नेछ । यसरी प्रतिनिधि छान्दा एकजना ४० वर्ष भन्दा कम उमेरको युवा अनिवार्य हुनुपर्नेछ ।
आठ सय सदस्यबाट एक प्रतिनिधि, जसमा महिला निर्वाचित गर्ने विधि तय गरिएको जनाएको छ ।
दलितका लागि प्रतिपाँच सय सदस्य एक प्रतिनिधि निर्वाचित गर्नुपर्ने प्रावधान छ । ट्रेड युनियनमा प्रदेशबाट सातजना प्रतिनिधि रहनेछन् । जनसंगठनबाट प्रतिजनसंगठन पाँचजनाको प्रतिनिधित्व रहनेछ । महासंघीय ढाँचामा रहेका जनसंगठनबाट भने सातजनाको प्रतिनिधित्व रहनेछ ।
विभाग र कार्यालयबाट एकरएकजनाको प्रतिनिधित्व रहनेछ भने प्रवासबाट महादेशअनुसार पाँचजनाको प्रतिनिधित्व रहनेछ ।
केन्द्रीय कमिटीबाट ३५४ जना स्वतः प्रतिनिधि हुनेछन् । अनुशासन आयोगबाट २९, लेखा आयोगबाट ३०, निर्वाचन आयोगबाट २५, सल्लाहकार परिषद्बाट २५ जना प्रतिनिधि रहनेछन् । यी कमिटीबाट जम्मा ४६४ जना स्वतः प्रतिनिधि हुनेछन् ।
एमालेको कुल संगठित सदस्य संख्या ६ लाख ६७ हजार ६३० सदस्यमध्ये प्रदेशबाट ४५, प्रतिनिधिसभाको निर्वाचन क्षेत्रबाट करिब ९७०, विशेष जिल्लाबाट ४७, दलितबाट ८१, ट्रेड युनियनबाट ४९, प्रवास, केन्द्रीय विभाग र कार्यालय, जनसंगठनसहित गरी अनुमानित १९ सयभन्दा बढी प्रतिनिधि रहनेछन् । पाँच प्रतिशत प्रतिनिधि केन्द्रीय कमिटीले मनोनयन गर्नेछ ।
