काठमाडाैँ । इन्डोनेसियाको पश्चिम सुमात्रा प्रान्तमा सोमबार भएको दुर्घटनामा ६ जनाको मृत्यु भएको छ भने अन्य केही व्यक्ति घाइते भएका छन्।

पदाङ पञ्जाङ सहर र बुकितिङ्गी सहर जोड्ने मुख्य सडकखण्डमा मल बोकेको ट्रेलर ट्रक, एउटा बाकस ट्रक र केही दुई पाङ्ग्रे सवारी साधन आपसमा ठोक्किँदा दुर्घटना भएको हो।

स्थानीय प्रहरीका अनुसार दुर्घटनापछि घटनास्थलमै पाँच जनाको मृत्यु भएको पुष्टि गरिएको थियो। त्यसपछि ट्रेलर ट्रकभित्र फसेको अवस्थामा थप एक जनाको शव फेला परेपछि मृतकको संख्या ६ पुगेको हो।

दुर्घटनामा घाइते भएकाहरूलाई तत्काल नजिकका अस्पतालमा उपचारका लागि पठाइएको छ।

प्रहरीले दुर्घटनाको कारण अहिलेसम्म खुल्न नसकेको जनाएको छ। हाल घटनास्थलको परीक्षण, सवारी साधन हटाउने कार्य भइरहेकाे छ भने  विस्तृत अनुसन्धान प्रक्रिया अघि बढाइएकाे छ ।